Ömmur hekla g-strengi

Pólskar ömmur í fjallaþorpinu Koniakow eru það allra vinsælasta í Póllandi um þessar mundir en þær eru önnum kafnar við að hekla g-strengs-nærbuxur. Ekki voru mikil viðskipti með heklaða dúka og annað handverk kvennanna og því gripu þær til þess ráðs að hekla eitthvað sem Pólverjar nútímans hefðu áhuga á.

Fyrirtæki pólsku ammanna hefur slegið í gegn og nú er rekin heimasíða þar sem hægt er að kaupa dýrgripina. Fólk er ekki bara vitlaust í g-strengi úr hefðbundnu hvítu hekli heldur líka í rauðu og svörtu, segir Tadeusz Rucki, sem er í forsvari fyrir ömmurnar pólsku. Þjóðræknisfélag Pólverja er þó ekki ánægt með nærfötin. Það er verið að draga dár að gömlum hefðum okkar. Slíkar flíkur hæfa ekki listinni að hekla, sagði forseti félagsins. Slóðin á Koniakow nærbuxurnar er www.koniakow.com.