Drakk úr einni flösku

Mál Romasar Kosakovskis, Litháans sem handtekinn var í Leifsstöð í febrúar er hann reyndi að smygla sex flöskum af amfetamínbasa og brennisteinssýru inn til landsins, var tekið fyrir í dómi í gær.

Flöskurnar fundust við gegnumlýsingu hjá tollgæslunni á Keflavíkurflugvelli og vitnuðu tollverðir fyrir dómi að grunsemdir hefðu vaknað þegar í ljós hafi komið við skoðun að á þær vantaði innsigli og ómögulegt hafi reynst að opna þær. Flöskurnar voru ein tekílaflaska, fjórar Perrier og ávaxtasafi.

Tveir tollverðir báru vitni fyrir dómi að Romas hafi um leið og ferðataskan hans var opnuð, gripið eina Perrier-sódavatnsflöskuna, opnað hana og fengið sér að drekka. Fyrir dómi kom fram að hinar fjórar Perrier-sódavatnsflöskurnar hafi innihaldið amfeta­mínbasa og brennisteinssýru, en að sögn Jakobs eiturefnafræðings hefði innihald þeirra dugað margfalt til að bana Romasi.

Brennisteinssýra er nauðsynleg til að vinna efni úr amfetamínbasa til neyslu að sögn Jakobs Kristinssonar, dósents í eiturefnafræði, sem bar vitni fyrir dómnum. Saksóknari sagði við dóminn að vökvinn sem Romas flutti hingað til lands, hefði dugað til að framleiða sautján og hálft kíló af amfetamíni.

Romas bar fyrir rétti að hann hafi verið neyddur til að drekka eina flöskuna og að mikill magaverkur hafi gert vart við sig þremur til fjórum tímum síðar. Hann hafi þá haft samband við lækni, sem hafi ráðlagt honum að drekka vatn.

Romas segist hafa keypt flöskurnar í góðri trú á götumarkaði í Kaunas, heimaborg sinni í Litháen, þar sem búa tæplega sjö hundruð þúsund manns að hans sögn. Hann gaf lögreglu lýsingu á manni sem seldi honum flöskurnar, við skýrslugerð hjá lögreglu, en lögregla ákvað að aðhafast ekkert frekar í málinu og reyndi ekki að finna umræddan mann.

Romas bar fyrir rétti að tilgangur ferðar hans hingað til lands hefði verið að fara í frí. Hann segist ekki hafa ætlað að hitta neinn hér á landi, en í lögregluskýrslu sem tekin var af honum við handtökuna sagðist hann hafa ætlað að hitta einhverja Kristínu sem hann kynntist á netinu. Lögreglu hefur ekki tekist að hafa upp á umræddri konu þrátt fyrir ítrekaðar tilra unir.

Við komu Romas til Íslands fundust á honum, auk ofangreinds, tveir farsímar. Hann sagði fyrir rétti er hann var spurður um ástæðu þess að hann ferðaðist með tvo farsíma, að hann tæki yfirleitt tvo farsíma með sér í ferðalög ef annar skyldi bila.

Dómur verður upp kveðinn í málinu eftir þrjár vikur.