Flutti edik í stað klórs

Klórgasmengun kom upp í sundlaug Eskifjarðar rétt eftir hádegi í gær og þurfti fjöldi fólks á aðhlynningu að halda vegna eitrunar. Orsök slyssins er að ediksýru var hellt í klórtank laugarinnar fyrir mistök. Þegar ediksýra blandast klór lækkar sýrustig skyndilega og klórgas losnar. Klórgas er stórhættuleg eiturlofttegund sem getur verið banvæn í ákveðnu magni.

Samkvæmt heimildum Fréttablaðsins var flutningabíll frá Olís, sem átti að fara með klór til sundlaugarinnar, með ediksýru í staðinn, án vitundar flutningabílstjórans. Ekki er ljóst nákvæmlega hvernig það átti sér stað að ediksýra var í stað klórs í flutningabílnum. Þorsteinn Ólafsson, forstöðumaður heildsöludeildar Olís, viðurkenndi að eitthvað hefði misfarist við flutninga á efnum til sundlaugarinnar, en ekkert yrði gefið upp fyrr en málið hefði verið skoðað ofan í kjölinn. Strangar reglur eru um hverjir mega flytja efni af þessu tagi.

"Það voru iðnaðarmenn, sem voru að störfum í byggingu sundlaugarinnar, sem fyrst urðu varir við klórgasið og forðuðu sér út," segir Jónas Vilhelmsson, yfirlögregluþjónn á Eskifirði, sem stjórnaði aðgerðum á vettvangi. Jónas segir óljóst hver tilkynnti slysið til lögreglunnar. Alls voru 34 fluttir til aðhlynningar á heilsugæslunni á Eskifirði og 25 af þeim fluttir áfram á Fjórðungssjúkrahúsið á Neskaupstað. Göngunum um Oddskarð og aðalgötunni á Neskaupsstað var lokað á meðan til að greiða fyrir umferð sjúkrabíla. Tveir voru svo fluttir þaðan með sjúkraflugi á Akureyri og fjórir til Reykjavíkur. Enginn er lífshættulega slasaður.

Jónas segir að ákveðið ferli hafi verið sett af stað þegar ljóst var hversu alvarlegt ástandið var. Haft var samband við samhæfingarstöðina í Reykjavík og björgunarsveitir kallaðar til ásamt læknaliði. Flugvél og þyrla Landhelgisgæslunnar voru send frá Reykjavík til Egilsstaða með slökkviliðsmenn, greiningarsveit frá Landspítala- háskólasjúkrahúsi auk bráðatækna. Tvær flugvélar fóru frá Akureyri til Neskaupstaðar með sjúkraflutningamenn og lækni.

Fjórtán hús og leikskóli í nágrenni sundlaugarinnar voru rýmd vegna klórgassins. Vindur var sex til átta metrar á sekúndu og út frá því var áætlað að tvo tíma tæki fyrir loftið að hreinsast að sögn Jónínu Sigurðardóttur, upplýsingafulltrúa samhæfingarmiðstöðvarinnar, sem heyrir undir almannavarnadeild Ríkislögreglustjóra. "Fólk var varað við því að vera á þessu svæði strax þegar vart varð við mengunina."

Lögreglan lauk störfum á vettvangi upp úr hálfátta um kvöldið og hafði þá lokið við að koma á jafnvægi á klórtankinum með því að dæla vatni og sóta í hann.