Stjórnmálamenn tjá sig oftast um Baug

Stjórnmálamenn eru áberandi flestir af þeim sem tjá sig um Baugsmálið í umræðuþátt­um ljósvakamiðlanna, eða 35 prósent. Þeim næstir eru einstakl­ingar tengdir starfi við fjölmiðla, en þeir koma fram í 22 prósent­um umræðuþátta.

Þetta er meðal þess sem fram kemur í skýrslunni Baugsmálið í fjölmiðlum, sem Fjölmiðlavaktin ehf. gaf út í byrj­un vikunnar. Björn Bjarnason dómsmála­ráðherra er meðal þeirra sem oftast tjá sig um málið í fréttum.

Hann skipar sér þar í hóp með einstaklingum sem annaðhvort eru málsaðilar eða vinna við málflutn­inginn. Björn kemur þarna fast á hæla Gests Jónssonar lögmanns, Jóns H. B. Snorra­sonar saksóknara og Jóns Ásgeirs Jóhann­essonar, framkvæmda­stjóra Baugs.

Samhliða þessari greiningu lét Fjölmiðlavaktin IMG Gallup gera símakönnun þar sem spurt var hvað hafi haft mest áhrif á skoðanir fólks á Baugsmálinu. Þar kemur í ljós að tæp 17 prósent almennings mótuðu skoð­anir sínar út frá eigin stjórnmála­skoðunum. Skoðuð var öll fjölmiðla­umfjöllun um Baugsmálið á tíma­bilinu 10. ágúst til 18. október. Skoðaðar voru fréttir, aðsendar greinar, umræðuþættir og hvert það sem fallið gat undir hið svokall­aða Baugsmál, hvort sem um var að ræða lög­reglurannsókn, birtingu ákæra eða aðkomu stjórnmála- og fjölmiðlafólks.

"Það er athyglisvert í þess­ari greiningu að þegar kemur að prentmiðlum þá er hlutfalls­lega mun meira af aðsendu efni og skoðun­um en við eigum að venjast í grein­ingum á umfjöllun um til dæmis fjármálamarkað eða önnur viðfangsefni," segir Magnús Heimis­son, sérfræðingur hjá Fjölmiðlavaktinni.

Hann bendir á að fréttir og fréttaskýringar hafi verið 58 prósent af blaðaefni um Baugs­málið, annað efni hafi verið 42 prósent. "Við eigum því að venjast að önnur umfjöllun en fréttir sé einungis um fimmtungur," segir Magnús.