Greiddu 682 milljónir fyrir ráðgjöf

Morgan Stanley fjárfestingabankinn fékk greiddar 682 milljónir króna fyrir ráðgjöf sína vegna sölu Símans. Tíu milljónir af söluandvirði Símans fóru til framkvæmdanefndar um einkavæðingu vegna nefndarlauna og ferðakostnaðar.

Greiddar voru rúmar 60 milljónir til viðbótar fyrir lögfræðiráðgjöf og greinargerðir og tæpar tíu milljónir fyrir aðra ráðgjöf og kostnað. Í framkvæmdanefnd um einkavæðingu sátu þeir Jón Sveinsson hæstaréttarlögmaður sem var formaður nefndarinnar, Baldur Guðlaugsson, ráðuneytisstjóri í fjármálaráðuneytinu, Sævar Þór Sigurgeirsson, löggiltur endurskoðandi, og Illugi Gunnarsson, aðstoðarmaður þáverandi forsætisráðherra. Verður maður feitur af 10 milljónum? Jón Sveinsson. "Nei, maður verður það nú ekki. Auðvitað var það gríðarleg vinna sem fólst í þessu verkefni og við teljum þessa upphæð hógværa miðað þá upphæð sem í verkefnið fór.

Í skýrslu sem einkavæðingarnefnd hefur sent frá sér kemur fram að sölukostnaður Símans hafi numið 786 milljónum króna. Ef tekið er tillit til viðbótararðgreiðslu upp á rúma fjóra milljarða króna frá því í febrúar nemi hlutfallslegur sölukostnaður um rúmlega einu prósenti af söluandvirði Símans. Framkvæmdanefnd um einkavæðingu lét fara fram mat á fyrirtækinu sem var fimmtán milljörðum undir söluverði. Söluverðið var 66,7 milljarðar króna en framkvæmdanefndin gerði ráð fyrir rúmum fimmtíu milljörðum í söluverð.