Minningar brjótast fram vegna snjóflóðs

Vigdís Finnbogadóttir, fyrrverandi forseti Íslands, segir miklar minningar brjótast fram þegar hún heimsæki Flateyri aftur, en hún er þar stödd til að minnast þess að tíu ár eru síðan snjóflóð féll á bæinn þar sem 20 manns létust.

Vigdís segir að það sé bæði hryggð og í senn feginleiki yfir því að staðurinn hafi náð sér að nokkru leyti eftir þennan mikla harmleik. Henni hafi þótt mjög vænt um að heimsækja minnisvarðann sem hefur verið reistur um þá sem létust í flóðinu. Þar hafi verið rifjað upp að þar fór heil fjölskylda í flóðinu.

Vigdís segir minnisvarðanum hafa verið haganlega komið fyrir og hann sé fallegur að því leyti að það sé stór steinn úr fjallinu sem sé settur niður fyrir framan kirkjuna og heimamenn hafi komið auga á það að hann líti út eins og engill. Nöfn hinna látnu séu meitluð í skjöld framan á steininum.

Aðspurð segir Vigdís að talsverðar breytingar hafi orðið á umhverfi þorpsins og henni sýnist Önfirðingar hafa gert snjóvarnargarða fyrir ofan bæinnn þannig úr garði að þeir séu ekki til lýta fyrir staðinn. Garðarnir séu miklir og í þá hafi verið sáð og hún hafi heyrt að á sumrin séu þeir bláir af lúpínu. Það hafi svo seinna sýnt sig að garðarnir hafi varið staðinn fyrir snjóflóðum, en snjóflóð hafi fallið að minnsta kosti í tvígang frá því að stóra flóðið varð.