Hús keypt fyrir 200 milljónir

"Við erum búnir að borga út öll hús sem búið var að semja um kaup á," segir Kristján Ríkharðsson, annar verktakanna sem vilja kaupa upp hesthús á svæði Hestamannafélagsins Gusts í Kópavogi. Þetta eru tuttugu eignarhlutar af um hundrað sem félagsmenn Gusts hafa selt. Greiðslurnar voru inntar af hendi síðastliðinn föstudag og Kristján segir fleiri vera að semja um sölu hesthúsa í kjölfarið.

Þetta munu vera um 200 milljónir alls sem greiddar hafa verið út til hesthúsaeigendanna. Stjórn Gusts hefur forkaupsrétt að húsum á svæðinu og hún hafði áður nýtt sér hann til að kaupa nokkur hús úr fyrri kauplotu verktakanna. Bjarnleifur Bjarnleifsson, varaformaður Gusts, segir hins vegar enga ákvörðun liggja fyrir um að nýta réttinn til að kaupa þessi hús.

"Menn eru bara að skoða spilin og sjá hvað gerist," segir hann og vill að öðru leyti lítið tjá sig um málið að svo stöddu. Kristján vonast til að samstarf við stjórn Gusts um uppbyggingu nýs framtíðarsvæðis fyrir félagsmenn komist á. Aðalfundi Gusts sem átti að vera í kvöld hefur verði frestað. Bjarnleifur neitaði því þó að það tengdist hesthúsakaupunum.