Eyfirskir bændur vilja kynbæta kúastofninn

Eyfirskir kúabændur samþykktu í vikunni ályktun til Landssambands kúabænda um að hafist verði þegar handa við undirbúning að kynbótum á íslenska kúastofninum með innfluttu erfðaefni. Í nóvember 2001 höfnuðu bændur hins vegar með afgerandi hætti kynblöndun íslenska kúastofnsins við þann norska.

"Nú er svo komið að íslenska kúakynið er, sökum skammrar endingar og mikilla kálfavanhalda, vart sjálfbært lengur. Á sama tíma hefur sala mjólkurafurða aukist talsvert, en nær engar líkur eru á að gerlegt sé að anna allri eftirspurn markaðarins eftir próteini á yfirstandandi verðlagsári," segir í ályktuninni. Ásthildur Skjaldardóttir, kúabóndi á Bakka á Kjalarnesi og stjórnarmaður í Búkollu, samtökum áhugafólks um íslensku mjólkurkúna, telur ekki að aðstæður hafi breyst á þann veg að skoða beri kynbætur stofnsins. Ásthildur segir mikla hagræðingu hafa átt sér stað undanfarið á kúabúum landsins og telur hana eiga eftir að skila sér margfalt, þótt tíma geti tekið að auka framleiðsluna.