Unnið verði að kjarnorkumálum

Íranar hyggjast halda áfram verkefnum tengdum auðgun úrans á næstu dögum. Þetta hefur IRNA-fréttastofan eftir næstæðsta manni innan kjarnorkustofnunar Írans í dag. Um er að ræða vinnu í Isfahan-verinu en þar er úran gert hreinna þannig að hægt sé að nota það sem eldsneyti í kjarnorkuveri eða kjarnorkuvopn sé það hreinsað enn frekar. Bandaríkjamenn telja að Íranar hyggi aðeins á það síðarnefnda en Íranar hafa staðfastlega neitað því og segjast aðeins ætla að nota kjarnorkubyggingar sínar til orkuframleiðslu fyrir landið. Íranar féllust á að gera hlé á kjarnorkuáætlun sinni í nóvember í viðræðum við fulltrúa Evrópusambandsins sem deila áhyggjum Bandaríkjamanna en samningaviðræður um að Íranar leggi áætlunina algerlega á hilluna hafa ekki skilað árangri. Hafa talsmenn Evrópusambandsins og Bandaríkjanna látið hafa það eftir sér að haldi Íranar áætlun sinni til streitu muni þeir vísa málinu til Öryggisráðs Sameinuðu þjóðanna.