Ný framsetning á leiðarkerfi

Leiðarlykill höfuðborgarsvæðisins, þar sem leiðarkerfi strætisvagna tekur á sig mynd neðanjarðarlestakerfis, kemur út í næstu viku. Höfundur kortsins hefur gengið með hugmyndina í maganum í meira en tuttugu ár og telur að það muni hvetja fleiri til að nota strætisvagna.

Ingi Gunnar Jóhannsson, landfræðingur og iðnaðarverkfræðingur, er höfundur kortsins sem svipar mjög til lestarkorta erlendis. Kortið er svokallað beinlínukort og gefur skýra mynd af leiðarkerfi strætisvagna á höfuðborgarsvæðinu. Kortið sem sem ber heitið Leiðarlykill höfuðborgarsvæðisins er að mati Inga Gunnars mjög einfalt og auðlesið. Ingi Gunnar hefur fundað með borgarstjóra og forsvarsmönnum Strætó.bs um notkun Strætó.bs á kortinu og hefur hann ekki orðið var við mikinn áhuga á þeim bæ.

Ingi Gunnar hefur gengið með hugmyndina að kortinu í maganum í yfir tuttugu ár eða frá því hann kynntist neðanjarðarlestarkerfum erlendis á skiptinemaárum sínum. Hann telur að kortið eigi eftir að hvetja fleiri til að taka strætó.

Það er Hagkaup, Bónus, Kringlan, Smáralind, Miðbæjarsamtökin og Nings sem gera Gunnari kleift að gefa kortið út og hægt verður að nálgast það hjá þeim.