Allar líkur meiri styrkleika

Fellibylurinn Beta leikur Nikaragva grátt sem stendur en bylnum hefur vaxið mjög ásmeginn og er hann nú af stærðargráðu þrjú. Veðurfræðingar segja allar líkur á að Beta verði enn sterkari þegar bylurinn skellur á skóglendi við ströndina eftir fáeinar klukkustundir.

Forseti landsins segir allt vera gert til að undirbúa landsmenn en engin leið sé að flytja fimmtíu þúsund manns á brott frá þeim svæðum sem talin eru í mestri hættu. Öldugangurinn er talinn geta náð allt að fimm metra hæð og spáð er rigningu allt að sextíu og fjórum sentimetrum.

Beta er tuttugasti og þriðji stormurinn á þessari fellibyljatíð, en það er mesti fjöldi sem mælst hefur.