Hamborgarhryggur á Suðurnesjum en hangikjöt á Ströndum

Suðurnesjamenn vilja hamborgarhrygg í jólamatinn en líta nánast ekki við rjúpu á sama tíma og rjúpan hefur ýtt hamborgarhryggnum út af jólaborði Mývetninga eftir að veiðibanninu lauk og hangikjöt heldur velli norður á Ströndum.

Samkvæmt lauslegri athugun NFS er marktækur munur á vinsælasta jólamatnum eftir landshlutum, sem í sumum tilvikum virðist mega rekja til nytja á hverjum stað.

Rösklega helmingur Suðurnesjamanna, eða 55 prósent, ætla að hafa hamborgarhrygg í jólamatinn, samkvæmt skoðanakönnun Víkurfrétta. Næst kemur kalkúnn, en fimm prósent ætla að hafa hann, fjögur prósent rjúpu, tvö prósent önd, en rúmlega þirðjungur er enn óákveðinn.

Rjúpnaveiði á Reykjanesskaganum myndi hvergi nær anna eftirspurn ef rjúpu ef hún væri jafn mikil og í Mývatnssveit. Eftir að veiðibanninu lauk hefur hún næstum ýtt hamborgarhryggnum til hliðar enda nóg af rjúpu á svæðinu handa öllum.

Norður á Ströndum, þar sem góður sauðfjárstofn stendur traustum fótum og riða er meðal annars óþekkt, heldur hangikjötið velli sem vinsælasti jólamaturinn. Grímseyingar hins vegar, sem lítið hafa af sauðfé og rjúpu, halla sér að hamborgarhryggnum eins og Suðurnesjamenn og í öllum tilvikum er átt við hátíðarmatinn á aðfangadagskvöld.