Telja kynslóð sem er við völd hafa afskrifað gamla fólkið

Eldri hjón, sem fréttastofa Stöðvar 2 hitti í dag, segjast kvíða því að lenda á hjúkrunarheimili og hugsanlega þurfa að skiljast að. Þau segjast hafa það á tilfinningunni að kynslóðin sem nú er við völd hafi afskrifað gamla fólkið.

Fjórir af hverjum tíu öldruðum á hjúkrunarheimilum þessa lands þurfa að deila herbergi með öðrum og nokkuð vantar upp á að öldruðum sé veitt næg aðstoð til að vera sem lengst á eigin heimili og að þeim sé tryggð aðstaða á öldrunarheimili þegar þau þurfa þess. Þetta kemur fram í nýrri skýrslu Ríkisendurskoðunar. Það sem flestir aldraðir vilja, og það sem mest áhersla er lögð á, er að sem flestir geti verið heima hjá sér sem lengst.

Erla og Jón áttu nýlega gullbrúðkaupsafmæli. Þau búa á eigin heimili en kvíða því þegar, og ef, sú staða kemur upp að þau þurfa að fara á hjúkrunarheimili. Móðir Erlu var ein af þeim sem var í brýnni þörf. Erla segir hana hafa dáið áður en hún hafi komist að á hjúkrunarheimili, það hafi tekið svo langan tíma.

Heilsa þeirra hjóna hefur verið góð og því hafa þau ekki hugsað mikið um að þau lendi hugsanlega í þessari aðstöðu. Jón segir að þess vegna hafi hann kannski ekki hugsað um hvort hann endi á hjúkrunarheimili, lokaður inni á herbergi með einhverjum öðrum karli og kona hans í einhverju öðru herbergi með annarri konu.

Hvernig skyldi þeim hjónum finnast kynslóðin sem er nú við völd hugsa um eldri borgara þessa lands? Jón segir það ofureinfalt. Hann hafi það á tilfinningunni að hún sé hér um bil búin að afskrifa þá. Þetta séu kannski stór orð en honum finnist unga fólkið í dag hafa svo mikið að gera að það megi ekki vera að því að hugsa um þá sem eldri eru og voru í raun undirstaða þeirrar velferðar sem ríkir í dag.

Jón tekur undir þá fullyrðingu að yngri kynslóðir gleymi að þær verði sjálfar gamlar en hann telji að það sé mannlegt að ýta þeirri hugsun frá sér eins lengi og hægt er. Flestir vonist til þess að verða gamlir en fæstir vilji vera það.