Alvöru stjörnustríð í Kaliforníu

Stjörnustríð er háð í Kaliforníu þessa dagana. Hollívúddleikararnir Warren Beatty og Arnold Schwarzenegger, sem jafnframt er ríkisstjóri, vega hvor að öðrum opinberlega. Margir telja að Warren Beatty sé að kanna hvort grundvöllur sé fyrir mótframboði á næsta ári.

Það blæs ekki byrlega fyrir Schwarzenegger þessa daganna. Fylgi hans mælist nú aðeins um 30% en framundan eru kosningar þar sem hann hefur lagt mikið undir.

Áttunda nóvember kjósa Kaliforníubúar um átta tillögur að lagabreytingum. Af þeim eru fjórar sem Schwarzenegger hefur lagt mikla áherslu á að fá samþykktar. Allar fjórar hafa mætt mikilli andstöðu hagsmunasamtaka sem persónugera þær í Tortímandanum fyrrverandi og eyða gríðarlegum fjármunum í neikvæðar auglýsingar.

Tillögurnar fjórar eru: Að losa um kjarasamninga kennara. Banna verkalýðsfélögum opinberra starfsmanna að eyða félagsgjöldum í pólitískum tilgangi án skriflegs leyfis félagsmanna. Losa um höft á fjárlögum ríkisins og auka vald ríkisstjóra og færa vald yfir kjördæmaskipan frá þinginu til þriggja manna nefndar.

Öflug félög húkrunarfræðinga, kennara og annarra opinberra starfsmanna hafa augljósra hagsmuna að gæta og hefur þeim borist liðsauki Hollywood leikarans og kennarasonarins, Warren Beatty. Hann mætir á hvern mótmælafundinn á fætur öðrum talar sem vanur pólitíkus, en hann hefur lengi verið harður demókrati eins og aðdáendur kvikmynda hans þekkja vel.

Stuðningsmenn Schwarzeneggers segja Beatty vera kjúkling sem ekki þori í alvöru slag. Beatty segist hins vegar bera hag barna sinna og fylkis fyrir brjósti, ekki vera á leiðinni í pólitík nema aðstæður neyði hann til.

Stóru orðin eru ekki spöruð og íbúar í Kaliforníu búa sig nú undir átök tveggja stjarna í ríkisstjórnarkosningunum á næsta ári. Því þó ríkisstjórinn Schwarzenegger sé í lægð núna telja menn erfitt að berjast við stjörnuljómann nema bjóða fram eitthvað annað sem stirnir.