Fyrsta óveður vetrarins

Fyrsta óveður vetrarins á Suður- og Vesturlandi skall á í dag. Á Kjalarnesi fór vindhraði í 42 metra á sekúndu í hviðum og í Vestmannaeyjum hafa björgunarsveitarmenn hjálpað fólki við að losa bíla sína úr snjósköflum.

Vest var veðrið á Suður- og Vesturlandi í dag þó það væri slæmt nánast um allt land. Innanlandsflug hefur legið niðri og hefur aðeins ein flugvél á leið til Færeyja tekið á loft á Reykjavíkurflugvelli. Síðasta flugathugun var klukkan sautján tíu og verður næst athugað með flug klukkan átta í kvöld en litlar líkur eru taldar á að nokkuð verði flogið.

Veðrið var einna verst á Kjalarnesi þar sem hvassviðrið var mikið en vindur fór upp í 38 til 42 metra á sekúndu í hviðum. Strætisvagn fauk út af veginum og skemmdist talsvert mikið. Lögreglan var ekki kölluð til vegna þessa umferðaróhapps en talið er að enginn hafi slasast. Fjórir voru fluttir á sjúkrahús eftir að jeppi valt á veginum sunnan við Hvalfjarðargöngin laust eftir hádegið. Tveir farþeganna festust í bílnum við veltuna svo nota þurfti klippur til að ná þeim lausum. Að sögn læknis á slysadeild er engin fjórmenninganna alvarlega slasaður. Vesturlandsvegur var lokaður um tíma vegna slyssins.

Veðrið hefur víðar verið vont. Í Árnessýslu og Rangárvallasýlu hefur verið blint vegna kófs í allan dag en snjór hefur ekki náð að festast á vegum. Seinni part dags hefur líka verið blint vegna kófs á Hellisheiði og í Þrengslum.

Í Vestmanneyjum hefur björgunarsveitin aðstoðað lögreglu við að losa fasta bíla. Á sunnanverðu Snæfellsnesi hefur verið illfært vegna óveðurs. Klettsháls er ófær en þar er blindbylur. Það sama er að segja um Hrafnseyrarheiði en þar hefur ekki verið lagt í að moka. Éljagangur og skafrenningur hefur verið á vegum á Norður- og Austurlandi en þeir eru flestir færir.