Hér og nú birti myndir í heimildarleysi

Tímaritið Hér og nú birti myndir af Strákunum á Stöð 2 og Eiði Smára Guðjohnssen í heimildarleysi og í óþökk ljósmyndaranna. Auðunn Blöndal og Sverrir Þór Sverrisson eru að kanna hvort vinnubrögð blaðsins standist lög.

Á forsíðu nýjasta tölublaðs Hér og nú er sagt frá ferð Auðuns, Sverris Þórs, betur þekktum sem Sveppa, og Eiði Smára til Las Vegas. Á forsíðunni og inni í blaðinu eru vel á þriðja tug mynda úr ferðinni, bæði af þremenningunum og konum þeirra sem voru með í för, við hin ýmsu tækifæri.

Myndirnar tóku ferðafélagarnir sjálfir og ætluðu þær ekki til opinberrar birtingar. Auðunn segir að myndirnar hafi verið vistaðar á læstri heimasíðu konu Auðuns sem ekki sé hægt að skoða án þess að hafa lykilorð. Heimasíðan sem um ræðir er læst; það kannaði fréttamaður í dag.

Blaðamaður Hér og nú segist hins vegar hafa fengið senda slóð sem vísar beint á myndirnar og að sú slóð hafi ekki verið læst. Blaðamaðurinn sendi fréttastofu þessa slóð og ekki þurfti lykilorð til að komast inn á hana. Þar voru myndir, en ekki myndirnar sem birtust í blaðinu, enda var búið að taka þær út.

Auðunn segir blaðamann tímaritsins hafa hringt í sig til að biðja um viðtal vegna ferðarinnar. Hann hafi neitað því og beðið hann um að birta ekki myndirnar, en án árangurs. Þá segist hann hafa spurt blaðamanninn hvernig hann hafi komist yfir myndirnar, en hann hafi neitað að gefa það upp. Bæði Auðunn og Sverrir Þór segjast vera að kanna hvort vinnubrögð Hér og nú séu lögleg.

Sigríður Rut Júlíusdóttir héraðsdómslögmaður segist telja að myndbirting af þessu tagi sé ólögleg, að því gefnu að hún sé í óþökk eigenda myndanna og að hún eigi ekki erindi til almennings. Að því leyti sé þetta mál nokkuð frábrugðið tölvupóstsbirtingum Fréttablaðsins, því þar megi að minnsta kosti færa rök fyrir því að almenningur eigi rétt á birtingu.