Farice verður stöðugur í janúar

Farice-sæstrengurinn bilaði enn eina ferðina í morgun og lá niðri í nokkra klukkutíma. Hann er þó kominn í fullt gagn aftur. Jón Birgir Jónsson hjá Farice ehf. segir ekki hafa verið um kerfisbilun að ræða heldur hafi strengurinn slitnað í óhappi við landtengingu í Skotlandi.

Farice-sæstrengurinn var tekinn í notkun í janúar árið 2004 og með tilkomu hans nær þrjúhundruðfaldaðist hraði tengingar Íslands við umheiminn. Síðan strengurinn var tekinn í notkun hefur hann þó bilað alloft og að sögn Jóns Birgis hjá Farice eru menn þar á bæ orðnir leiðir á því þófi. Ástæður bilananna hafa í öllum tilfellum verið óhöpp í Skotlandi, til dæmis gróf grafa strenginn eitt sinn í sundur, einu sinni fór lest út af sporinu og sleit hann og einu sinn valt bíll ofan í skurð þannig að strengurinn slitnaði. Jón Birgir segir að nú standi þetta vandamál til bóta, fyrirhugað sé að setja upp aðra landtengingu í Skotlandi og þá verði það þannig að ef annar strengurinn slitnar þá taki hinn sjálfkrafa við, mjög ólíklegt er að báðir geti slitnað í einu. Samningar þessa efnis eru tilbúnir og bíða nú undirritunar og búist er við verklokum í janúar 2006. Flutningsgeta Farice er 720 gígabit á sekúntu sem jafngildir ellefu milljón símtölum samtímis. Til samanburðar er flutningsgeta Cantat3, hins sæstrengsins sem tengir Ísland við umheiminn, 2,5 gígabit á sekúnt eða nær þrjúhundruð sinnum minni. Cantat 3 var tekinn í notkun fyrir rúmum ellefu árum.