Enginn alvarlega slasaður

Fjórir voru fluttir á sjúkrahús eftir að jeppi valt á veginum sunnan við Hvalfjarðargöngin laust eftir hádegið. Tveir farþeganna festust í bílnum við veltuna svo nota þurfti klippur til að ná þeim lausum. Að sögn læknis á slysadeild er enginn fjórmenninganna alvarlega slasaður og munu líklega allir verða útskrifaðir síðar í dag. Bæði lögregla og sjúkralið frá Akranesi og Reykjavík voru kölluð á vettvang. Vesturlandsvegur var lokaður um tíma vegna slyssins en hefur nú verið opnaður. Fyrr í dag fór hópferðabíll út af veginum á Kjalarnesi en engan sakaði. Óveður er á Kjalarnesi og varar Vegagerðin vegfarendur við því að fara þar um að óþörfu.