Búist við hækkun á vöxtum húsnæðislána

Allt stefnir í að vextir af húsnæðislánum hækki á næstunni þar sem vextir á skuldabréfamarkaði hækka nú daglega.

Sérfræðingar KB banka segja að miðað við stöðuna núna þyrftu vextir Íbúðalánasjóðs til dæmis að vera 4,65 prósent en ekki 4,15, eins og þeir eru nú. Þetta þýddi 8 til 9 prósenta hækkun á fjáfmagnskostnaði fyrir hinn almenna lántakanda. Er þarna miðað vð rekstarforsendur sjóðsins og bent á hversu lítill munur sé orðin á innláns- og útlaánsvöxtum hans þannig að lánskjörin standi ekki undir rekstrarkostnaði hans.

Síðastliðið haust lækkaði fjármagnskostnaður vegna íbúðakaupa um 30 til 40 prósent, sem leiddi til mikilla verðhækkana, en nú ætti kostnaðurinn að hafa hækkað um allt að níu prósent, en það gæti leitt til tveggja prósenta lækkunar á húsnæðisverði á næstunni samkvæmt fasteignalíkani greiningardeildarinnar.

Nú styttist í næsta lánsfjárútboð Íbúðalánasjóðs og er því almennt spáð á peningamarkaðnum að þá verði sjóðurinn að hækka vexti upp í 4,30 prósent og að bankarnir muni strax gera slíkt hið sama auk þess sem þeir hafa upp á síðkastið meira og minna verið að lækka lánshlutfallið vegna íbúðakaupa og þrengja ýmis önnur skilyrði.