Verið að meta tjón af völdum vatnavaxta

Búið er að tilkynna um tjón í 16 byggingum á Höfn í Hornafirði. Ekki liggur enn fyrir hversu mikið tjón varð af völdum þeirra miklu vatnavaxta sem áttu sér stað á Hornafirði nýverið en mat stendur yfir. Að sögn Alberts Eymundssonar, bæjarstjóra á Hornafirði, eru tryggingarfélögin að meta tjónið fyrir þá sem fyrir því urðu. Hann segir að ekki sé enn komin samantekt yfir tjónið frá tryggingarfélögunum en bæjaryfirvöld muni kynna sér heildartölur tjónsins þegar þær liggi fyrir. Eins og staðan er í dag hefur verið tilkynnt um tjón í 16 byggingum. Albert sagði hugsanlegt að enn ættu fleiri tilkynningar eftir að bætast við þá tölu.