Norrænt samstarf að verða útflutningsvara

Norðurlandasamstarfið og norrænt samfélag er að verða að útflutningsvöru, segir Rannveig Guðmundsdóttir, forseti Norðurlandaráðs, en þingi ráðsins lauk í Reykjavík í dag. Hún segir að hrakspár um að samstarf norrænu landanna yrði óþarft við inngöngu sumra þeirra í ESB, hafi ekki gengið eftir.

Á þingi Norðurlandaráðs voru lagðar fram áætlanir um aðgerðir og úrbætur í ýmsum málum, meðal annars á sviði jafnréttismála og í málefnum fatlaðra. Þingið samþykkti meðal annars lagasetningu um fjárhættuspil, sem miðar að því að samræma aðgerðir í þeim tilgangi að hvert Norðurlandanna geti stjórnað fjárhættuspilamarkaðnum.

Um ákvörðun menningarmálaráðherra Norðurlandanna um að fækka norrænum menningarstofnunum á næstunni, segir forseti Norðurlandaráðs að það eigi eftir að koma í ljós hvort sú ákvörðun veiki Norðurlandasamstarfið eða auki skilvirkni. Markmiðið sé að auka skilvirkni og að nýta fjármagn betur til framkvæmda og verkefna.