Flug til suður Grænlands í biðstöðu

Flugsamgöngur milli Íslands og suður Grænlands eru í biðstöðu eftir að loftferðasamningur milli landanna rann úr gildi fyrr í haust. Ef ekki nást samningar milli heimastjórnar Grænlendinga og Flugfélags Íslands gæti svo farið að flugsamgöngur milli Íslands og suður Grænlands leggist af um óákveðinn tíma.

Árni Gunnarsson, framkvæmdarstjóri Flugfélags Íslands , segir að beðið sé eftir viðbrögðum grænlensku heimastjórnarinnar. Flugfélag Íslands sé búið að gera tilboð en ekki sé ljóst að svo stöddu hvort Grænlendingar muni taka því og þar með endurnýja loftferðasamning milli landanna.

Þrátt fyrir að ekki séu margir farþegar sem fljúga þessa leið, þá eru samgöngurnar þýðingarmiklar fyrir ferðaþjónustu bæði á Grænlandi og Íslandi. Árni segir að á síðasta ári hafi farþegafjöldi verið um 2000 manns. Flugsamgöngur séu þó þýðingarmiklar fyrir suður Grænland og Íslendinga, sérstaklega með ferðaþjónustuna í huga. Ef ekki komist á loftferðasamningar á ný gæti svo farið að ferðamenn myndu ekki skila sér í sama mæli til suður Grænlands. Á hinn bóginn hafi þetta engin áhrif á loftferðasamning til austur Grænlands en flug þangað haldist áfram óbreytt.