Vilja völlinn í Vatnsmýrinni

Margir þeirra sem börðust hvað harðast gegn sameiningu sveitarfélaganna í Eyjafirði, og eru taldir hafa haft mikið að segja um að sameiningu var hafnað, hafa nú skorið upp herör gegn flutningi Reykjavíkurflugvallar.

Íbúar í Dalvíkurbyggð eru byrjaðir með undirskriftasöfnun gegn flutningi Reykjavíkurflugvallar úr Vatnsmýri. Áfram, nýstofnuð hagsmunasamtök Dalvíkurbyggðar, standa fyrir undirskriftasöfnuninni og segir Þorkell Ásgeir Jóhannsson, formaður samtakanna, baráttuna gegn flutningi Reykjavíkurflugvallar fyrst og fremst byggða á öryggishagsmunum, einkum sjúkrafluginu.

Undirskriftasöfnunin er ekki bundin við Dalvíkurbyggð. Forsvarsmenn samtakanna vonast til að fá íbúasamtök og einstaklinga sem víðast um land standi fyrir undirskriftasöfnun. Þorkell segist vonast til að sem flestir hafi samband við samtökin gegnum heimasíðuna afram.is og taki þátt í undirskriftasöfnuninni.

Samtökin Áfram eru sprottin upp úr baráttu Svarfdælinga gegn sameiningu sveitarfélaganna í Eyjafirði en barátta þeirra var talin hafa mikil áhrif á að andstaða við sameiningarhugmyndir var jafn mikil og raun ber vitni. Svarfdælingar telja að hagsmuna þeirra hafi ekki verið gætt í kjölfar sameiningar þriggja sveitarfélaga í Dalvíkurbyggð.