Hagsmunir ferðaþjónustu miklir vegna Grænlandsflugs

27. október 2005 14:00

Vestnorræna ráðið ræðir nú hvernig koma megi í veg fyrir að flug frá Íslandi til Grænlands leggist af, en samningur við Grænlendinga þar að lútandi rennur út um áramótin. Framkvæmdastjóri Vestnorræna ráðsins segir mikla hagsmuni í húfi bæði fyrir grænlenska og íslenska ferðaþjónustu.

Grænlenski þingmaðurinn Ole Dorph kvartaði yfir því á þingi Norðurlandaráðs í gær að það hefði tekið hann níu tíma að komast frá Narsarsuaq á Suður-Grænlandi til Íslands vegna þess að hann hefði þurft að fljúga í gegnum Kaupmannahöfn. Vakti hann athygli á því að þiggja ára loftferðasamningur milli Grænlands og Íslands um sumarflug hefði runnið út í haust, en íslensk og grænlensk stjórnvöld hafa styrkt flugið um tuttugu og fimm milljónir á samningstímanum.

Sigríður Anna Þórðardóttir, starfsráðherra Íslans, segir samningaviðræður hafa staðið yfir í þrjú ár en þær hafi verið árangurslausar til þess. Ljóst er að Norðurlandaráð getur ekki styrkt flugið beint þar sem ekki má veita ríkisstyrki til fyrirtækja í samkeppnisrekstri.

Málið hefur hins vegar verið rætt á vettvangi Vestnorræna ráðsins, en að því eiga Íslendingar, Grænlendingar og Færeyingar aðild. Að sögn Þórðar Þórarinssonar, framkvæmdastjóra Vestnorræna ráðsins, hafa menn áhyggjur af málinu enda séu miklir hagsmunir í húfi fyrir ferðaþjónustuna bæði á Íslandi og á Suður-Grænlandi. Samstarf um ferðaþjónustu í löndunum byggist á greiðum samgöngum og ódýru flugi milli Grænlands og Reykjavíkur og því séu miklir hagsmunir í húfi fyrir ferðaþjónustuna. Þórður segir menn ekki vita nákvæmlega hversu mikið fé tapist ef flugleiðin milli Reykjavíkur og Narsarsuaq verði lögð niður en hins vegar markaðassetji menn svæðið mikið sem eina heild. Allir aðilar í ferðaþjónustu hafi af því miklar áhyggjur að það muni hafa í för með sér mikinn tekjumissi og fækkun á ferðamönnum verði flugleiðin lögð niður. Þórður bendir enn fremur á að þessi óvissa um áframhaldandi flug til Narsarsuaq komi í veg fyrir að ferðaþjónustufyrirtæki geti skipulagt starfsemi sína næsta sumar.

Íslensk stjórnvöld hafa þegar ákveðið að styrkja flugið en beðið er eftir svari frá grænlensku landsstjórninni sem á að berast innan tveggja vikna. Ef þau styrkja flugið ekki gæti svo farið að flugferðum yrði fækkað, en það er flugfélaga að sækja um styrk til flugsins.

Fréttir Innlent

Mest lesið

Fleiri fréttir