Fyrirtæki flýja land

Framkvæmdastjóri Samtaka iðnaðarins hefur verulegar áhyggjur af flótta íslenskra fyrirtækja til útlanda. Hann segir fjarri því að alltaf sé hægt að tala um jákvæða útrás því fjöldi starfa hafi tapast hér á landi vegna hennar á undanförnum árum.

Enn eitt fyrirtækið stefnir að því að flytja starfsemi sína erlendis. Nú er það Medcare-Flaga en hátt í 40 starfsmönnum hér á landi hefur verið sagt upp störfum hjá fyrirtækinu frá og með næstu mánaðamótum. Hvort um flótta eða útrás er að ræða er spurning en stjórnendur fyrirtækisins segja breytingarnar gera félaginu kleift að vaxa hraðar á Bandaríkjamarkaði en hér á landi. Framkvæmdastjóri Samtaka iðnaðarins hefur áhyggjur af þróun mála og að ekkert bendi til að breyting sé að verða á. En hverju er um að kenna.

Sveinn segir aðeins eina lausn á málinu. Sameiginleg mynt líkt og margar Evrópuþjóðir hafa verið að taka upp. Það myndi draga úr öllum sveiflum, viðskiptakostnaði og vaxtakostnaði. Hann segir menn ekki vera að gera neitt til að koma í veg fyrir að fyrirtækin flytji úr landi en í raun sé engin bráðabirgðalausn á málinu.

Sveinn segir Samtök iðnarðarins hafa engar tölur um það hversu mörg störf hafi tapast á undanförnum árum vegna útrásar fyrirtækja en þau skipti þó tugum ef ekki hundruðum. Útrás íslenskra fyrirtækja sé því ekki einungis af hinu góða eins og margir vilja meina. Megi einnig tala um flótta fyrirtækjanna en þetta séu tvær hliðar á sama peningi.