Ráðherrar funda

Heilbrigðisráðherrar Norðurlandanna hittast á næstunni til þess að ræða aðkallandi aðgerðir gegn mögulegum fuglaflensufaraldri. Anders Fogh Rasmussen, forsætisráðherra Danmerkur, greindi frá þessari ákvörðun á blaðamannafundi í Reykjavík í gær. Hann sagði að aðgerðir miðuðust við fyrirbyggjandi aðgerðir og framleiðslu á bóluefni.

Einnig er gert ráð fyrir að sérfræðingar verði fengnir til þess að spá fyrir um útbreiðslu flensunnar. Fundur norrænu heilbrigðisráðherranna hefur ekki verið endanlega tímasettur. Vinnuhópur á vegum Norrænu ráðherranefndarinnar hefur þegar safnað upplýsingum sem gagnast heilbrigðisyfirvöldum ef faraldur brýst út.

Fyrirhugað er að ljúka umræddri skýrslu í næsta mánuði og í kjölfar þess verður tekin ákvörðun um það hvort haldinn verði sérstakur ráðherrafundur um fuglaflensuvá.