400 störf verða til

Alcoa Fjarðaál hefur samið við IMG Mannafl-Liðsauka um að fyrirtækið muni ráða alla starfsmenn álversins á Reyðarfirði, um 400 manns, á næstu tveimur árunum. Í tilefni þess mun ráðningarfyrirtækið opna útibú á Reyðarfirði.

"Það er ekkert atvinnuleysi á Íslandi, en fyrir mitt leyti hef ég ekki áhyggjur af því, ég held við munum ekki eiga í vandræðum með að fylla þessar stöður," sagði Gunnar Haugen, framkvæmdastjóri IMG Mannafls-Liðsauka, á fréttamannafundi í gær.

Ætlunin er að ráða í allar þessar stöður hér á landi og eiga fyrirtækin ekki von á að þurfa að sækja um atvinnuleyfi fyrir neinn, þó einhverjir starfsmanna verði væntanlega af erlendu bergi brotnir. Búist er við því að um helmingur starfsfólksins komi að austan en hinn helmingurinn af höfuðborgarsvæðinu. Lokið verður við gerð kjarasamninga í byrjun næsta árs og er ekki talið ólíklegt að langtímasamningar verði gerðir, líkt og gert var hjá Norðuráli.