Víða vatnstjón á Höfn

Talið er að hátt í 20 hús hafi orðið fyrir vatnstjóni á Höfn í Hornafirði um helgina eftir eina úrkomumestu helgi sem sögur fara af þar á slóðum. Enn er verið að meta skemmdir af völdum tjónsins. Steinþór Hafsteinsson, slökkviliðsstjóri á Höfn, var einn þeirra sem sá um að tæma götur bæjarins. Hann sagði að slökkviliðið hefði hafist handa við að dæla burt vatni um hádegi á laugardag og vinna þeirra hafi staðið til um klukkan tíu um kvöldið. Hann sagði að margir hefðu skemmt sér yfir vatninu sem flæddi víða, siglt um á kajak og börn hefðu meira að segja lagst til sunds. Sigfús Már Þorsteinsson varð fyrir töluverðu tjóni en vatn flæddi inn í íbúð hans við Höfðaveg. Sigfús segir að þegar mest var, hafi vatnshæðin náð um fimm sentíimetrum. Parket á gólfinu er ónýtt en hann segir að tjónaskoðunarmaður sé að meta tjónið af völdum vatnsins. Sigfús segir að hann og kona hans, Svala Hjaltadóttir, hafi reynt að ausa burt vatninu en ekki haft undan. Það var því lítið hægt að gera annað en að ganga um á stígvélum um íbúðina. Helgi Már Pálsson bæjarverkfræðingur segir að verið sé að kanna ástandið en hann telur að hátt í 20 hús hafi orðið fyrir tjóni að völdum vatnavaxtanna. Hann segir vatn hafa flætt inn á ótrúlegustu stöðum líkt og í kjallara Hafnarkirkju sem er sú bygging sem stendur hvað hæst á Höfn. Helgi telur að víða hafi verið um að ræða staðbundin vandamál og stíflur sem orsakaði að það flæddi inn í kjallara kirkjunnar og víðar.