Verslun varð að félagsmiðstöð

 „Maður verður einhvern veginn að bjarga sér þegar kreppir að,“ segir Ísak Sigurgeirsson en hann og eigin­kona hans, Senee Sankla, eiga verslunina Ásbyrgi í Kelduhverfi sem nú skiptir um hlutverk. Versluninni var lokað 8. ­okt­ó­­ber­­ síðastliðinn í fyrsta skipti í 31 árs sögu hennar en stefnt er að því að opna hana aftur næsta sumar. Hjónin ætla ekki að sitja aðgerðarlaus á meðan heldur vilja þau þakka sveit­ungum í Kelduhverfi trygglyndið sem þeir hafa sýnt versluninni og því verður hún opin fjórar klukkustundir á föstudögum fyrir þá til að hittast og drekka kaffi. „Verslunin hefur náttúrlega nokkuð félagslegt gildi fyrir fólk hérna og var eins og félagsmiðstöð svo ég afréð að reyna að anna því áfram,“ segir Ísak. Hann segir að stjórnvöld hafi lengi látið í veðri vaka að vegir yrðu bættir á svæðinu og haldið opnum yfir allt árið en öðru sé nú nær. „Gjöldin hækka sífellt en vegirnir versna og ferðamenn áttu ekki greiða leið hingað fyrr en 20. júní í sumar. Það er verið að segja að ferðamannatímabilið sé alltaf að lengjast en við förum varhluta af því,“ segir Ísak.