Bundið í stjórnarsáttmála

„Þetta var hluti af okkar landsfundarályktun síðast og hluti af okkar kosningastefnuskrá,“ sagði Geir H. Haarde á landsfundi Sjálfstæðisflokksins um matarskattinn. Séra Halldór Gunnarsson í Holti spurði ráðherrann um þetta stefnumál flokksins. Geir svaraði að í stjórnarsáttmálanum væri kveðið á um skattalækkanir, meðal annars breytingar á erfðafjárskatti, niðurfellingu eignarskatts, stórfellda lækkun tekjuskatts og afnám hátekjuskatts. „Það er einnig talað um að gera breytingar á virðisaukaskattskerfinu til hagsbóta fyrir almenning. Í mínum eyrum hljómar orðalagið til hagsbóta fyrir almenning þannig að það getur ekki verið um neitt annað að ræða en lækkun. Það á hins vegar eftir að útfæra þetta milli stjórnarflokkanna. Ég hef fullar vonir um það að því muni ljúka með fullnægjandi hætti fyrir okkur áður en þetta kjörtímabil er á enda. Og að því munum við stefna,“ svaraði Geir.