Kanóar horfnir af götunum

Tekist hefur að dæla öllu vatni burt af götum Hafnar í Hornafirði, að sögn Helga Más Pálssonar bæjarverkfræðings. Bæjarbúar eru því hættir að róa um göturnar á kanóum og geta gripið til bílanna á ný. „Þetta er allt komið í gott lag, við vorum að til klukkan ellefu á laugardagskvöld og þá var vatnið farið að sjatna eftir því sem stytti upp,“ sagði Helgi Már. „Göturnar eru núna orðnar þurrar og allir pollar farnir.“ Bæjarbúar voru beðnir um að láta vita eftir helgina hvort einhverjar skemmdir hefðu orðið hjá þeim og býst Helgi við að nokkuð hafi verið um þær. Talið er að flætt hafi inn á allt að fimmtán heimili í bænum. „Ég held að í það minnsta nokkrir kjallarar hafi farið undir vatn og alls kyns raftæki og dót, frystikistur og þess háttar, getur hafa skemmst. Göturnar eru ekki mikið skemmdar en eitthvað um skemmdir á gangstéttum og hellulögnum.“ Að sögn Helga voru orsakir flóðanna mikil úrkoma og haustlauf sem stífluðu niðurföll. „Það myndaðist mikil samkennd í fólki og allir hjálpuðust að við að koma bænum í fyrra horf. Það er góður andi í bænum og ég held reyndar að krakkarnir hafi bara haft ansi gaman af þessu.“