Rúnar Kristins á heimleið

Rúnar Kristinsson, leikmaður Lokeren í Belgíu og einn af leikjahæstu leikmönnum íslenska landsliðsins frá upphafi, segist vel geta hugsað sér að koma heim til Íslands í vor en þá rennur samningur hans við belgíska félagið Lokeren út. „Það er góður möguleiki á því að ég komi heim. Ef ég fæ tækifæri til þess að vera áfram þá er það líka freistandi. Það hefur gengið vel hjá mér að undanförnu og ég er sáttur við líkamlegt form mitt það sem af er tímabili. Það kemur líka til greina að hætta alveg í fótboltanum þar sem ég hef verið lengi í atvinnumennsku þannig að kannski verður þetta bara orðið nóg.“ segir Rúnar í viðtali við Fréttablaðið í dag. Rúnar lék með KR áður en hann fór utan í atvinnumennsku. Hann segist vel geta hugsað sér að spila með KR að nýju. „Ég er mikill KR-ingur og auðvitað kemur það til greina að leika með liðinu þegar ég kem heim. En það fer eftir því hvort ég verð í líkamlegu standi til þess að halda áfram af fullum krafti. Ég hef ekkert verið að skoða möguleikana heima á Íslandi en kannski gerir maður það þegar þar að kemur. Það hefur enginn verið í sambandi við mig til þess um að spila með einhverjum liðum heima á Íslandi næsta sumar. Ég mun skoða mín mál í rólegheitunum og er ekkert að stressa mig yfir því þó þetta verði hugsanlega mitt síðasta tímabil í atvinnumennsku.“ Rúnar var kosinn efnilegasti leikmaður Íslandsmótsins árið 1987 en þá var hann að stíga sín fyrstu skref með liði KR, átján ára gamall.