Sláturfé sett á gjöf

„Það er snjór yfir öllu, og við þurfum að fara að gefa sláturlömbunum," segir Lovísa Ragnarsdóttir, bóndi á Hemlu í Rangárvallasýslu. Lovísa er búin að senda um 140 lömb í sláturhúsið, en á 70 eftir. „Við ætlum að setja rúllu út, og reyna að komast hjá því að taka féð inn strax." Fæstir bændur gera ráð fyrir að gefa þurfi sláturfé, og svona ástand getur komið sér illa fyrir bændur. Sláturhúsinu á Kirkjubæjarklaustri var lokað í haust, en sláturlömbum hefur þó ekki fjölgað mikið á Selfossi, vegna niðurskurðar á fé í fyrra, að sögn Hermanns Árnasonar, stöðvarstjóra Sláturfélags Suðurlands á Selfossi. „Við bregðumst við þessu -ástandi nú bæði með því að -slátra-- fleiri skepnum í hverri viku og svo munum við vinna eitthvað á laugardögum til að létta á pressunni, því auðvitað er Sláturfélagið ekkert annað en félag bænda og við gerum allt sem við getum til að greiða götu þeirra," segir Hermann. Ágúst Rúnarsson, bóndi í -Vestra--Fíflholti- er búinn að senda 250 lömb til slátrunar, og um 200 bíða enn. „Það er ekki mjög víða á landinu sem menn geta geymt lömbin við góðar aðstæður á þessum tíma árs, nema hreinlega að taka þau inn, og þá er það ekki alltaf við æskilegar aðstæður," segir Ágúst. Hann bætir því við að sauðfjárbændur verði að aðlagast lengri sláturtíð en áður tíðkaðist, því hún sé í hag bænda þar sem lengri sláturtíð þýði að neytendur geta keypt ferskt kjöt fram til jóla, sem aftur gefur bændum hærra verð fyrir skepnurnar.