Vaxandi sóknarfæri hjá smábátum

Arthur Bogason, formaður Landssambands smábátaeigenda, segir að smábátarnir eigi vaxandi sóknarfæri vegna þess að togveiðar og fleiri veiðiaðferðir eigi nú undir högg að sækja hjá umhverfisverndarsinnum. Í setningaræður sinni á 20. ársfundi landssambandsins í morgun lagði hann áherslu á þá hugmyndafræði að kynna þessar veiðar sem vistvænar, þær væru líka byggðavænar fyrir strjálbýlið, notuðu minni orku en aðrar veiðar og hráefnið bæris ávalt nýtt að landi. Arthur Bogason segir nokkur fyrirtæki erlendis þegar hafa sett fram þessar kröfur og þær muni bara aukast. Sóknarfærin liggi því í krónum en ekki tonnum því Íslendingar virðist vera algjörlega fastir í hjólförum með þorskstofninn, alla vega hvað varði mat á stærð hans. Aðspurður hvort hann eigi við að aðrar veiðiaðferðir en aðferðir smábátasjómanna verði á undanhaldi segir Arthur að það sé ekki spurning að hans mati. Á vettvangi Sameinuðu þjóðanna hafi verið ráðist harkalega gegn botndregnum veiðarfærum á úthöfum á togurum. Það séu því ekki bara íslenskir trillukarlar sem hafi bent á þessa hluti.