Fjársöfnun kærð til lögreglu

Stígamót hafa kært til lögreglunnar símasöfnun, sem sögð er til stuðnings samtökunum, en ábending um að símasöfnun væri hafin barst til Guðrúnar Jónsdóttur, starfskonu Stígamóta, í morgun. Stígamót standa ekki fyrir neinni fjársöfnun þessa dagana. Í símtalinu, sem Guðrún fékk, var henni sagt að maður hefði fengið símtal frá fólki úti í bæ og verið beðinn um að styrkja Stígamót. Maðurinn lét eitt þúsund krónur af hendi rakna og var sú upphæð tekin út af kortinu hans. Stígamót hafa kært símasöfnunina til lögreglunnar og er nú búið að rekja símtalið. Guðrún segir ástæðu til að vara við svona símasöfnunum. Þó að fólk meini vel eigi það ekki að standa fyrir fjársöfnun í nafni samtakanna upp á eigin spýtur. Þeir sem fái svona símtöl eigi að neita um stuðning og láta vita af símtalinu.