SMÍ og FF í hár saman

Skólameistarafélag Íslands og Félag framhaldsskólakennara eru komin í hár saman vegna deilna sem verið hafa uppi innan Menntaskólans á Ísafirði. Upphaf málsins má rekja til deilna Ólínu Þorvarðardóttur, skólameistara Menntaskólans á Ísafirði, og Ingibjargar Ingadóttur, enskukennara við skólann, á síðasta ári, en þá áminnti Ólína Ingibjörgu fyrir ágalla við yfirferð á á prófum. Ingibjörg stefndi skólanum í kjölfarið og lauk þeim deilum með sátt fyrir dómara. Deilurnar blossuðu hins vegar aftur upp í vor og haust og tóku á sig nýja mynd 5. október í síðustu viku þegar Félag framhaldsskólakennara sendi frá sér yfirlýsingu vegna fréttar Bæjarins besta tengdri málinu þar sem blaðið var harðlega gagnrýnt fyrir ófagleg og óábyrg vinnubrögð við fréttaflutninginn. Í gær skarst svo stjórn Skólameistarafélags Íslands í leikinn og sakar í yfirlýsingu stjórn Félags framhaldsskólakennara um afar óvægna árás á skólameistara Menntaskólans á Ísafirði í yfirlýsingu sinni 5. október. Skólameistarafélagið segir yfirýsingu Félags framhaldsskólakennara í mörgum atriðum efnislega ranga og mjög óheppilega á þeim tíma þegar reynt sé að skapa frið um skólastarf í Menntaskólanum á Ísafirði. Félagsvísindastofnun HÍ vinnur nú að úttekt á ýmsum þáttum skólastarfs Menntaskólans á Ísafirði til að upplýsa óljós atriði í þeim deilumálum er staðið hafa í skólanum undanfarið, en það var Ólína Þorvarðardóttir sem óskaði þess við ráðuneytið að úttektin færi fram. Niðurstöðunnar er að vænta síðar í þessum mánuði.