Vesturbyggð takmarkar rjúpnaveiði

Öll skotveiði hefur verið bönnuð á eignarjörðum Vesturbyggðar öðrum en einstaklingum sem eiga lögheimili í sveitarfélaginu frá og með morgundeginum. Frá þessu er sagt á vefútgáfu Bæjarins besta og haft eftir Jónasi Sigurðssyni, aðalvarðstjóra í lögreglunni á Patreksfirði að nokkuð ljóst sé að í meira og minna allri austursýslunni er veiði bönnuð nema með leyfi landeiganda. Búist er við töluverðum fjölda skyttna á svæðið og hann segir að fylgst verði með þeim eins og alltaf hefur verið gert þegar rjúpnaveiðitímabil er að byrja.