Kópavogs-kjarasamningur felldur

Félagsmenn í Starfsmannafélagi Kópavogs felldu í gær kjarasamning sem skrifað var undir þann 20. september. 53,2 prósent þeirra sem kusu höfnuðu samningnum, en alls kusu 51 prósent félagsmanna. Í félaginu eru 700 manns sem starfa á bæjarskrifstofum, í leikskólum, sundlaugum, grunnskólum og fleiri vinnustöðum í bænum. Þetta er í annað sinn síðan í júlí sem félagið fellir gerðan kjarasamning. "Við munum hugsa málið um helgina, hvað verður næsta skref, afla verkfallsheimildar eða skjóta málinu aftur til ríkissáttasemjara," segir Jófríður Hanna Sigfúsdóttir, formaður félagsins.