50 milljónir í umsóknina

Alþingi hefur að minnsta kosti fimm undanfarin ár fjallað um og samþykkt aukin framlög til fastanefndar Íslands í New York vegna framboðs til öryggisráðs Sameinuðu þjóðanna. Árið 2001 samþykkti Alþingi fjórtán milljóna króna framlag vegna viðbótarstarfsmanns hjá fastanefndinni í New York. Í fjárlögum þess árs segir að stefnt sé að því að Ísland taki sæti í öryggisráði Sameinuðu þjóðanna árin 2009 og 2010 og því þurfi "að byggja starfsemi fastanefndarinnar upp jafnt og þétt á næstu árum". Árið 2003 samþykkti Alþingi níu milljóna króna framlag fyrir nýtt stöðugildi hjá fastanefndinni vegna fyrirhugaðs framboðs til öryggisráðsins. Á fjárlögum 2004 var gert ráð fyrir tuttugu milljóna króna framlagi til fastanefndarinnar í New York vegna sérfræðikostnaðar og ritara. Framlagið er beinlínis tengt auknum umsvifum nefndarinnar í tengslum við fyrirhugað framboð Íslands til öryggisráðsins. Á fjárlögum þessa árs var samþykkt fimm milljóna króna fjárveiting til að fjölga um einn fulltrúa á alþjóðaskrifstofu. "Þörf er á að efla verulega þátttöku Íslands í starfsemi SÞ vegna fyrirhugaðs framboðs Íslands til öryggisráðsins haustið 2008. Gera má ráð fyrir að kostnaður af einu stöðugildi nemi um átta milljónum króna og mun þessi fjárveiting fjármagna stöðuna að hluta," eins og segir orðrétt í greinargerð með fjárlagafrumvarpinu. Fjárveitingar til fastanefndarinnar hjá Sameinuðu þjóðunum í New York hafa hækkað úr um 86 milljónum á fjárlögum árið 2000 í tæplega 200 milljónir króna á þessu ári. Samanlagt hafa á þessu tímabili 48 milljónir verið merktar sérstaklega umsókn um sæti í öryggisráðinu. Eftir því sem næst verður komist hafa stjórnarliðar í þingflokkum Sjálfstæðisflokksins og Framsóknarflokksins, sem nú hafa gert athugasemdir við framboðið eða lýst andstöðu við það, ekki greitt atkvæði gegn þessum fjárveitingum.