Fasteignasali hafi blekkt seljanda

Fasteignasali í Reykjavík misnotaði aðstöðu sína þegar hann seldi syni sínum íbúð og blekkti þar með seljandann sem og aðra áhugasama kaupendur, að mati lögfræðings Húseigendafélagsins. Þetta er grófasta brot sinnar tegundar sem komið hefur inn á borð Húseigendafélagsins og hefur það verið kært til eftirlitsnefndar Félags fasteignasala. Fyrr í mánuðinum tók fasteignasala í Reykjavík að sér að selja íbúð í Hlíðunum fyrir eldri konu. Par gerði tilboð í eignina og á sama tíma lagði sonur fasteignasalans einnig fram kauptilboð. Parið heldur því fram að eiganda íbúðarinnar hafi verið tjáð að hún gæti ekki gert báðum aðilum gagntilboð og hafi verið beitt þrýstingi til að gera syni fasteignasalans tilboð, en sá eignaðist íbúðina í kjölfarið. Aðspurð hvort ekki geti verið að sonur fasteignasalans hafi verið með besta tilboðið segir Hrund Kristinsdóttir, lögfræðingur Húseigendafélagsins, að það sé rétt, eins og tilsvör sölustjóra fasteignasölunnar hafi verið, að börn fasteignasala þurfi líka að geta keypt sér fasteign. Það verði hins vegar að vera alveg klárt að þegar einhverjir sem hafa náin tengsl við fasteignasala sýni eign áhuga beri fasteignasalanum skýlaus skylda til að vísa viðkomandi eign til sölumeðferðar hjá öðrum fasteignasala og gera þar tilboð. Ásett verð eignarinnar var 22,9 milljónir. Sonur fasteignasalans fékk hana á 22,2 milljónir, lagði fram tilboð sem var 700 þúsund krónum hærra en það sem parið bauð. Hrund segir það engu skipta hvort seljandi hafi fengið sanngjarnt verð eða ekki. Fólk verði að trúa því þegar það komi inn til fasteignasala, sem gæti mikilla trúnaðarstarfa fyrir fólk, að það sitji við sama borð og aðrir sem séu að gera tilboð í sömu eign. Hrund er ekki í nokkrum vafa um það að fasteignasalinn hafi framið alvarlegt lögbrot. Verði hann fundinn sekur á hann yfir höfði sér fangelsisvist og sektargreiðslu auk þess sem hann missir starfsleyfi. Hrund segir enn fremur að þetta sé grófasta mál sem Húseigendafélagið hafi fengið inn á borð til sín af þessum toga. Því má bæta við að annar eigandi fasteignasölunnar var fyrr á árinu dæmdur í sjö mánaða fangelsi fyrir fjárdrátt, skjalafals og umboðssvik. Hann er lögmaður og var framkvæmdastjóri Félags fasteignasala um árabil og er jafnframt eiginmaður umrædds fasteignasala.