Enginn lifði af flugslys

Hundrað tuttugu og einn lét lífið þegar flugvél kýpverska flugfélagsins Helios brotlenti í nágrenni við Aþenu í gær. Sjónarvottar segja að flugvélin hafi flogið inn í hæðótt landslagið norðan við borgina og að kviknað hafi í henni um leið og hún lenti. Brak dreifðist yfir stórt svæði og í kjölfarið braust út mikill eldur sem læsti sig í skógi vaxið umhverfið. Flugvélin var á leiðinni til Prag með millilendingu í Aþenu en tildrög slyssins eru enn nokkuð óljós. Flest bendir til þess að loftþrýstingur hafi skyndilega fallið í vélinni og flugmennirnir misst meðvitund í kjölfar lofteitrunar af þeim völdum. Flugmenn herflugvéla sem sendar voru til að fylgja flugvélinni segjast hafa séð aðstoðarflugmanninn meðvitundarlausan í stjórnklefanum. Þar að auki segjast sjónarvottar sem komu að vélarflakinu hafa séð súrefnisgrímur fyrir vitum líkanna sem lágu á víð og dreif í kring um flakið, en slíkar grímur falla niður í farþegarýminu ef loftþrýstingur breytist. Frændi eins farþegans segist hafi fengið SMS-skilaboð frá honum einungis nokkrum mínútum áður en flugvélin fórst. Þar hafi hann sagt flugmaðurinn væri blár í framan og að fimbulkuldi væri í farþegarýminu. Þetta er talið benda til þess að fleira hafi verið að en bara loftþrýstingurinn. Áður en flugvélin lagði af stað í leiðangurinn fannst bilun í loftræstibúnaði vélarinnar en henni var veitt brottfararleyfi eftir að átt hafði verið við bilunina. Margir hafa viljað tengja þetta beint við slysið og eru fjölmargir aðstsandendur fórnarlamba slyssins á þeirri skoðun að flugfélagið beri ábyrgð á því. Hópur aðstandenda safnaðist saman fyrir framan höfuðstöðvar Helios flugfélagsins og kallaði forsvarsmenn félagsins morðingja. Tildrög slyssins verða vonandi bráðum ljós en grísk flugmálayfirvöld segjast vera búin að finna flugrita vélarinnar.