Valur í úrslitaleikinn gegn Fram

Valsmenn unnu Fylki, 2-0 og tryggðu sig í úrslitaleikinn gegn Fram í VISA bikarkeppni karla í knattspyrnu í kvöld. Garðar Gunnlaugsson skoraði bæði mörk Valsmanna í leiknum, það fyrra strax á 3. mínútu. Markið kom eftir sendingu frá Bjarna Ólafi Eiríkssyni af vinstri kanti. Seinna markið á 80. mínútu þegar boltinn barst aftur til hans eftir að hann hafði skotið boltanum í Bjarna Þórð Halldórsson markvörð Fylkis sem kom út á móti. Skotið fór í innra hliðarnetið fjær þaðan sem Garðar var í baráttu við varnarmann vinstra megin við vítateig. Garðar hefur þar með skorað  8 mörk í fjórum leikjum fyrir Val í bikarkeppninni. Daninn Christian Christiansen sem kom inn sem varamaður gerði stutt stopp á vellinum og fékk rautt spjald á 65. mínútu. Hann fékk gult fyrir brot og svo annað fyrir leikaraskap.