Mun stærra hlaup en síðast

Skaftárhlaup náði hámarki í gær og hafði vatnsrennslið mælst mest 620 rúmmetrar á sekúndu þegar Fréttablaðið fór í prentun í gærkvöld. Það er mun meira en í síðasta hlaupi í ánni sem varð árið 2003. Vöxturinn var hægur og bítandi en þó svo mikill að blaðamaður sem var í Skaftárdal um miðjan dag í gær sá greinileg merki þess að hlaupið færi vaxandi. Oddsteinn Kristjánsson bóndi, sem fæddur er og bjó í Skaftárdal þar til ársins 1973 en býr nú á Hvammi í Skaftártungu, segist sjá mun á Skaftárhlaupum eftir að gaus við Grímsvötn. "Áður fyrr kom hún allt í einu með mun meiri gassagangi, nú fer hún sér hægar en hlaupin standa frekar lengur yfir," segir Oddsteinn. Hlaupið hafði ekki náð hámarki þegar blaðamaður tók hús á Oddsteini en þó var áin farin að flæða að túnfætinum. Bóndinn að Hvammi er þó uppalinn við bakka Skaftár og lætur sér ekki allt fyrir brjósti brenna þó að Skaftá gerist ágeng. "Það væri öllu verra ef Katla færi að láta á sér kræla, það fer nú að koma tími á það en hlaupin gera engum mein. Ekki nema það að þau skilja eftir sig sand úti um allar jarðir, það er allt og sumt." Sverrir Óskar Elefsen hjá Vatnamælingum Orkustofnunar segir fátt hægt að segja um framvindu hlaupsins en taldi þó líklegt í gær að hlaupið myndi réna um kvöldið. Þó yrði vatnsrennslið enn mikið í dag og næstu daga. Skaftárhlaup á upptök sín á svæði á Vatnajökli en þar er jarðhiti og því myndast þar svokallaðir katlar. Þeir fyllast af jökulvatni uns undan lætur og hlaup hefst. Katlarnir eru tveir en þar sem ekki hafði verið hægt að fljúga yfir jökulinn í gærkvöld var ekki vitað úr hvorum katlinum hlaupið á upptök sín.