Leikur við Venesúela í lausu lofti

Knattspyrnusamband Venesúela segir á heimasíðu sinni að landsleik milli Íslands og Venesúela í knattspyrnu, sem fyrirhugaður var 17. ágúst, hafi verið aflýst.Geir Þorsteinsson, framkvæmadstjóri knattspyrnusambands Íslands, segir þessa tilkynningu ótímabæra "Það hefur ekki verið staðfest við mig ennþá að áhugi fyrir því að landslið Venesúela leiki á Laugardalsvelli þann 17. ágúst sé ekki fyrir hendi. Þvert á móti hef ég fengið það staðfest hjá umboðsmanni knattspyrnusambands Íslands í Argentínu, sem hefur verið okkar tengiliður í sambandi við þennan leik, að leikurinn muni fara fram. Þetta er líka svolítið einkennilegt þar sem ekki var búið að ganga frá lausum endum í sambandi við leikinn. Það átti eftir að nái samkomulagi um ferðatilhögun og ýmislegt fleira." Ásgeir Sigurvinsson, annar þjálfara íslenska landsliðsins, var áhyggjufullur þegar hann heyrði af þessu. "Það verða mikil vonbrigði ef ekki verður hægt að staðfesta þennan leik 17. ágúst, því það er ekki mikill tími til þess að undirbúa annan leik á sama tíma. Við Logi Ólafsson erum þegar byrjaðir að búa okkur undir leikinn gegn Venesúela og getum ekki annað en vonast eftir því að leikurinn fari fram, eins og rætt hefur verið um." Fjölmiðlar í Venesúela hafa gagnrýnt för landsliðsins til Íslands og segja hana peningasóun. Á heimasíðu knattspyrnusambands Venesúela stendur jafnframt að í stað íslenska liðsins muni Venesúela leika gegn landsliði Ekvador í borginni Loja, sem er í suðurhluta Ekvador. Landslið Venesúela er sem stendur 24 sætum fyrir ofan hið íslenska, í 68. sæti, en Ísland er númer 92. Landslið Ekvador hefur hins vegar verið að hækka sig jafnt og þétt á listanum og er í sæti númer 33.