Enginn byggir á öryggissvæðinu

Samgönguráðherra segir ljóst að enginn byggi á öryggissvæði Reykjavíkurflugvallar. Fyrirhugað byggingasvæði Háskólans í Reykjavík nær inn fyrir öryggisgirðingar Reykjavíkurflugvallar og upp að flughlaði björgunarþyrlna Landhelgisgæslunnar. Ekkert samráð var haft við flugmálayfirvöld um byggingaráformin. Borgaryfirvöld hafa kynnt byggingarreit Háskólans í Reykjavík en þegar grannt er skoðað kemur í ljós að hann nær að öryggissvæðum flugbrauta og þyrluflughlaði Landhelgisgæslunnar. Þegar öryggisnefnd íslenskra atvinnuflugmanna leitaði til Flugmálastjórnar kom í ljós að ekkert samráð hafði verið haft við flugmálayfirvöld um byggingaráformin né áhrif þess á flugöryggi. Sturla Böðvarsson samgönguráðherra segist hafa haldið sig til hlés í umræðunni og beðið þess að borgaryfirvöld hefðu frumkvæði í málinu. Þaðan hefði hins vegar ekkert heyrst. Honum finnst það furðulegt og segir það hafa komið sér í opna skjöldu að gert hefði verið ráð fyrir byggingum á þessu svæði. „Þetta er auðvitað algerlega ómögulegt,“ segir Sturla. Sturla segir að ekki komi til greina að byggja innan öryggissvæðisins og það hafi verið gert ráð fyrir samráði við samgönguyfirvöld um byggingar í næsta nágrenni í samkomulagi hans og borgarstjóra vegna Samgöngumiðstöðvar á svæðinu. Það fylgi enda mikill hávaði flugrekstrinum og erfitt að ímynda sér aðra starfsemi í næsta nágrenni. Hann segir það hafa verið tiltekið sérstaklega í samkomulaginu að haft yrði samráð um málið. Sturla ítrekar að það sé alveg ljóst að innan öryggisgirðinga verði ekkert byggt.