Sjónarhornið á vændiskaupandann

Fimmtíu til níutíu prósent þeirra kvenna sem leiðast út í vændi hafa verið misnotaðar í æsku, að sögn framkvæmdastýru Kvennaathvarfsins. Goðsögnin um hamingjusömu gleðikonuna er lífseig og snýst um að konan sem selji líkama sinn geri það af fúsum og frjálsum vilja. Í fréttum Stöðvar 2 á laugardagskvöld var viðtal við íslenska vændiskonu sem sagði að sér liði vel með að stunda vændi. Hún léti menn borga sér fyrir kynlíf með sér í stað þess að stunda skemmtistaðina, fara með næturgesti heim og fá ekkert borgað. Félagsfræðingar sem Stöð 2 ræddi við segja svör vændiskonunnar viðhalda goðsögninni um hamingjusömu gleðikonuna. Hún sé þó ekki sönn. Drífa Snædal framkvæmdastýra Kvennaathvarfsins segir að goðsögnin sé líffseig og um leið nauðsynleg til að viðhalda þeirri peningamaskínu sem vændi er á Íslandi. Hún segir raunveruleikann vera annan því 50-90% þeirra sem leiðast út í vændi hafa verið misnotuð sem börn. Það er búið að fara yfir mörk þessa fólks, útmá eðlileg samskipti og því hafi þeir lítið val. Hún segist sjá svipaða afleiðingu og af nauðgunum og að sumar konur segja að þetta sé svipað og borguð nauðgun og afleiðingarnar eru áfallastreita, þunglyndi, kvíði, sjálfsvígstilraunir og sjálfsvígshugsanir. Vændi er í boði á netinu, í símaþjónustum, dagblöðum, skemmtistöðum, hótelum og fleiri stöðum, án þess að yfirvöld grípi í taumana. Fjöldi kvennasamtaka á Íslandi telur að til bóta væri að gera kaup á vændi ólögleg líkt og í Svíþjóð, en samkvæmt þeim lögum sem hér gilda, er það sá sem selur líkama sinn sem er lögbrjótur og þá aðeins ef hann hefur vændi að aðalstarfi. Drífa segir að Kvennathvarfið vilji beina sér að þeim sem bæði kaupa þjónustuna og segist vera fylgjandi sænsku aðferðinni.