Uppnám vegna heimsóknar

Uppnám ríkir í viðskiptalífinu og innan utanríkisþjónustunnar vegna hótana kínverskra yfirvalda. Þau eru ævareið vegna komu taívanskrar sendinefndar hingað til lands og hóta aðgerðum. Sendinefnd með sjálfum utanríkisráðherra Taívans kom hingað til lands síðdegis og hóf þar með óformlega heimsókn sem valdið hefur töluverðu uppnámi. Kínverjar eru æfir vegna heimsóknarinnar, þeir vilja ekki að neinn eigi samskipti við fulltrúa stjórnvalda á Taívan, sem þeir líta á sem uppreisnarhérað, og þegar Taívanar fá stimpil í vegabréf ríkis sem nánast hvergi er viðurkennt er það stórmál í augum Kínverja. Íslenska utanríkisráðuneytið sver af sér nokkur afskipti af heimsókninni og sagði Gunnar Snorri Gunnarsson, ráðuneytisstjóri, að þarna væru á ferð venjulegir ferðamenn með ferðamannaáritun í einkaerindum. Kínverjunum er nokk sama og hafa, samkvæmt heimildum fréttastofunnar, hótað því að rifta viðskiptasamningum sem gerðir hafa verið nýlega og spilla fyrir íslenskum hagsmunum á alþjóðavettvangi. Spenna mun vera innan utanríkisþjónustunnar vegna málsins og íslenskir kaupsýslumenn, sem gert hafa samninga við Kína nýverið, eru sagðir vita af óánægju Kínverjanna. Enda hafa þeir ekki legið á þeirri skoðun sinni við ráðuneyti, stofnanir og viðskiptamenn í dag, að heimsóknin sé óhæfa. Hjá forsetaskrifstofunni fengust þau svör að sendinefndin hefði ekki snúið sér þangað, en engin svör fengust um hvort að kínverska sendiráðið hefði með einhverjum hætti komið óánægju sinni til skila. Taívönum er mikið í mun að vekja ekki athygli en þó að heimsóknin sé sögð einkaerindi og íslensk stjórnvöld segist koma hvergi nærri er fréttastofunni kunnugt um að hvorugt er með öllu satt. Taívanska sendinefndin mun í kvöld hitta þingmenn, meðal annars Bjarna Benediktsson og Jón Gunnarsson, sem og frammámenn í viðskipta- og menningarlífi í Perlunni og hefur sótt stíft að hitta sem flesta til að kynna þeim málstað Taívans. Nefndin heimsækir svo útflutningsráð á morgun, en það skipulagði til að mynda stærstan hluta heimsóknar forseta Íslands til Kína fyrir hönd utanríkisráðuneytisins og í samstarfi við sendiráðið í Peking. Kínverjar hafa áður haft í hótunum vegna samskipta Íslendinga og Taívana sem og raunar samskipta þeirra við aðrar þjóðir, en hafa sjaldnast fylgt hótununum eftir af nokkurri hörku.