Þröngt mega flugfarþegar sitja

Icelandair og Iceland Express eru í hópi þeirra flugfélaga heims sem þéttast raða fólki í vélarnar sínar samkvæmt úttekt bresks fyrirtækis. Sterling, sem einnig er í eigu Íslendinga, er það flugfélag sem býður farþegum upp á minnsta sætarýmið. Sennilega eru þeir fleiri en færri flugfarþegarnir sem kvarta undan því að þröngt sé á milli sæta þegar þeir fljúga til og frá Íslandi. Upplýsingar frá bresku fyrirtæki, Skytrax, sem norska blaðið Aftenposten fjallaði nýlega um, sýna að íslensku flugfélögin Icelandair og Iceland Express eru í þeim hópi flugfélaga sem raða fólki hvað þéttast í flugvélar sínar. Mælt var bilið á milli sætisbaka til að fá út það rými sem farþegum væri boðið upp á. Á viðskiptafarrými er það British Airways sem býður upp á mesta plássið, 185 cm bil á milli sæta. Athygli vekur að Japan Airlines er í öðru sæti með 157 cm en Japanir eru ekki ýkja hávaxnir. American Airlines býður 152 cm rými á viðskiptafarrými. Ef við færum okkur nær og skoðum norrænu flugfélögin þá er SAS með 127 cm rými og Finnair sömuleiðis en á viðskiptafarrými Icelandair er rýmið aðeins 99 sentímetrar. Rússneska flugfélagið Aerflot er með svipað rými, 97 cm, en minnsta rýmið reyndist hjá Maersk Air eða 84 cm. En skoðum þá almenna farrýmið þar sem ódýrustu fargjöldin eru. Þar eru tvö flugfélög í Asíu með mesta rýmið, 86 cm, American Airlines og Japan Airlines bjóða sömuleiðis upp á rúmgóð sæti eða á bilinu 84-89 cm, norrænu félögin SAS og Finnair eru með 81 cm, Aerflot sömuleiðis, þar fyrir neðan kemur Icelandair með 79 cm, Iceland Express er einnig með 79 cm, eins og British Airways, en það er hins vegar enn þrengra um borð í vélum Ryanair og Easy Jet. Og þrengst er í vélum Sterling, aðeins 72 sentímetrar á milli sæta. Upplýsingafulltrúi Icelandair, Guðjón Arngrímsson, segir varðandi viðskiptafarrýmið að þar sé verið að bera saman flugfélög í langflugi við flug á styttri og meðallöngum leiðum sem sé allt annar hlutur. Varðandi almenna farrrýmið segir hann Icelandair með sambærlegt rými og flest flugfélög Evrópu.