Handsprengja hafi verið virk

Bandaríska alríkislögreglan, FBI, greindi frá því í dag að handsprengja, sem kastað hefði verið í átt að George Bush Bandaríkjaforseta við hátíðahöld í Tíblisi í Georgíu í síðustu viku, hefði verið virk en ekki sprungið vegna bilunar. Handsprengjunni var varpað í átt að forsetanum þegar hann hélt ræðu á Frelsistorginu í Tíblisi og lenti hún um 30 metra frá honum. Í tilkynningu frá FBI segir að forsetinn og Míkhaíl Saakashvílí, forseti Georgíu, hafi ásamt nærstöddum verið í hættu og þá hét talsmaður stofnunarinnar verðlaunum fyrir upplýsingar sem leitt gætu til handtöku tilræðismannsins eða -mannanna. Þessar niðurstöður ganga þvert á niðurstöður georísku lögreglunnar sem taldi að um platsprengju hefði verið að ræða sem átti að vekja ótta meðal þeirra tugþúsunda sem söfnuðust saman á Frelsistorginu í Tíblisi til að hlýða á Bush. Þá hafði Hvíta húsið áður lýst því yfir að forsetinn hefði aldrei verið í hættu. Ekki hefur fengist skýring á þessu misræmi.