Talibanaráðherra í framboð

Fyrrverandi ráðherra í ríkisstjórn talibana í Afganistan hefur ákveðið að bjóða sig fram til þings í kosningum sem fram fara í september. Wakil Ahmed Muttawakil gegndi embætti utanríkisráðherra Afganistans þegar talibanar fóru með völdin en var handtekinn þegar Bandaríkjamenn réðust inn í landið síðla árs 2001 í kjölfar árásanna 11. september. Muttawakil var sleppt fyrir um tveimur árum og hefur ásamt nokkrum öðrum háttsettum talibönum átt í sáttaviðræðum við núverandi stjórnvöld í Afganistan, en Muttawakil hefur ætíð verið talinn meðal hófsamari talibana. Alls hafa 2000 manns boðið sig fram til setu í neðri deild afganska þingsins, en Afganar velja fulltrúa í 249 sæti 18. spetember næstkomandi.